ពិធីសម្ពោធដាក់ឱ្យប្រើប្រាស់ជាផ្លូវការ មជ្ឈមណ្ឌលបណ្ដុះបណ្ដាលបើកបរយានយន្តធុនធ្ងន់ ស្ថិតនៅត្រង់ចំណុចគីឡូម៉ែត្រលេខ១៨-១៩ សង្កាត់សំរោង ខណ្ឌព្រែកព្នៅ រាជធានីភ្នំពេញ ភ្នំពេញ​ ៖​ នៅថ្ងៃព្រហស្បតិ៍ ៧រោច ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៤ ខែកុម្ភៈ ឆ្នាំ២០២១ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីសម្ពោធបើកឱ្យប្រើប្រាស់ជាផ្លូវការមជ្ឈមណ្ឌលបណ្តុះបណ្តាលបើកបរយានយន្តធុនធ្ងន់ ដោយមានការអញ្ជើញចូលរួមពីថ្នាក់ដឹកនាំក្រសួង តំណាងក្រសួងពាក់ព័ន្ធ អគ្គនាយកក្រុមហ៊ុន កាំត្រង់ស៊ីប អាជ្ញាធរដែនដី មន្ត្រីរាជការ អង្គការដៃគូ សមាគមដឹកជញ្ជូនទំនិញ សមាគមដឹកជញ្ជូនអ្នកដំណើរ ក្រុមហ៊ុនដឹកជញ្ជូនអ្នកដំណើរនិងទំនិញ សាលាបង្រៀនបើកបរយានយន្ត និងភាគីពាក់ព័ន្ធ ប្រមាណ ២០០នាក់ផងដែរ។ សូមជម្រាបជូនថា មជ្ឈមណ្ឌលបណ្តុះបណ្តាលបើកបរយានយន្តធុនធ្ងន់ និងទីលានប្រឡងថ្មី មានផ្ទៃដីទំហំ​ ១៦.៥៨៤ម៉ែត្រការ៉េ ដែលរួមមាន អគាររដ្ឋបាលទំហំ ៨៤០ម៉ែត្រការ៉េ ទីលានសម្រាប់បង្រៀន និងប្រឡងយកបណ្ណបើកបរយានយន្តធុនធ្ងន់ ទំហំ ៨.៩០៩ម៉ែត្រការ៉េ និងអគារស្នាក់នៅសម្រាប់សិស្ស មកពីបណ្តាខេត្តនានាមានទំហំ ៣៤៥ម៉ែត្រការ៉េ ព្រមទាំងមានការបំពាក់សម្ភារបរិក្ខារទំនើបៗជាច្រើនទៀត ស្ថិតនៅតំបន់សង្កាត់សំរោង ខណ្ឌព្រែកព្នៅ ត្រង់ចំណុចគីឡូម៉ែត្រលេខ១៨-១៩ រាជធានីភ្នំពេញ ត្រូវបានសហការបង្កើតឡើងនៅថ្ងៃទី០៥ ខែកក្កដា ឆ្នាំ២០១៩ រវាងក្រសួងសាធារណការ និងដឹកជញ្ជូន និងក្រុមហ៊ុនកាំត្រង់ស៊ីប តាមរយៈកិច្ចសន្យាលេខ ៦០០៧ សក.ដជគ ចុះថ្ងៃទី៣១ ខែធ្នូ ឆ្នាំ២០១៩។

គួរកត់សម្គាល់ថា​ ៖ បច្ចុប្បន្ននេះ កម្ពុជាកំពុងមានការខ្វះខាតអ្នកបើកបររថយន្តដឹកអ្នកដំណើរធុនតូច-ធុនធំ រថយន្តសណ្តោង ធុនស្រាល និងរថយន្តសណ្តោងធុនធ្ងន់ដែលបានចុះបញ្ជីតាំងពីឆ្នាំ១៩៩០-២០២០ មានចំនួនសរុប ៣២៥.៥០៨គ្រឿង ចំនួនអ្នកមានបណ្ណបើកបររថយន្តប្រភេទ D1, D2, BE, CE មានចំនួន ២១.៨៦៤០បណ្ណ​ ស្មើនិង ៦៧% នៃចំនួនប្រភេទរថយន្តខាងលើ​ ដែលបានចុះបញ្ជី ចំពោះរថយន្តដឹកទំនិញធុនធ្ងន់ ក្បាលសណ្តោងគ្រឿងចក្រ និងប្រភេទរថយន្តធុនធ្ងន់មួយចំនួនទៀត ដែលតម្រូវឱ្យមានបណ្ណបើកបរ ប្រភេទ C ដែលបានចុះបញ្ជីមានចំនួន  ១០៥.៩០៣គ្រឿង ក្នុងនោះចំនួនអ្នកមានបណ្ណបើកបររថយន្ត ប្រភេទ​ C មានចំនួន ៨៤.៩០០បណ្ណ ស្មើនិង ៨០% នៃចំនួនប្រភេទរថយន្តខាងលើដែលបានចុះបញ្ជី។ 

 

យោងតាមរបាយការណ៍គ្រោះថ្នាក់ចរាចរណ៍ផ្លូវគោកប្រចាំឆ្នាំ២០១៩ ចំនួនអ្នកស្លាប់ដោយសារគ្រោះថ្នាក់ចរាចរណ៍មានចំនួន ២.១៥២នាក់ ក្នុងនោះអ្នកស្លាប់ដោយសាររថយន្តធុនធ្ងន់បង្ករមានចំនួន ១៨១នាក់ ស្មើនិង​ ៨,៤% រថយន្តដឹកអ្នកដំណើរធុនធ្ងន់​ ៥០,២៧%ស្មើនិង ៩១នាក់ និងរថយន្តដឹកទំនិញធុនធ្ងន់ ៤៩,៧២% ស្មើនឹង ៩០នាក់)។  បើប្រៀបធៀបជាមួយចំនួនអ្នកស្លាប់ដោយសាររថយន្តធុនធ្ងន់បង្ករ (ស្លាប់១៤៧នាក់) នៅឆ្នាំ២០១៨ គឺមានការកើនឡើង​ ៣៤នាក់។

 

ថ្លែងទៅកាន់អង្គពិធី ឯកឧត្តមទេសរដ្ឋមន្ត្រី បានគូសបញ្ជាក់ថា ការបើកសម្ពោធដាក់ឱ្យដំណើរការជាផ្លូវការមជ្ឈមណ្ឌលបណ្តុះបណ្តាលបើកបរយានយន្តធុនធ្ងន់ថ្មីនេះ នឹងមានការបញ្ចុះតម្លៃចំនួន​ ៥០% សម្រាប់អ្នកដែលមកចុះឈ្មោះចូលរៀនមុនគេបង្អស់ចំនួន​ ៥០នាក់ ចំណែកថ្លៃសិក្សាធម្មតាមានចំនួន ៣៥០ដុល្លារ ជាតម្លៃសេវាសាធារណៈរបស់រដ្ឋ ហើយការបង្រៀនទ្រឹស្តីមានរយៈពេល​ ៣០ម៉ោង និងបង្រៀនដៃចង្កូត​ ២០ម៉ោង ស្របតាមស្តង់ដាជាតិ និងអន្តរជាតិ។  ទំនាក់ទំនងចុះឈ្មោះ តាមទូរសព្ទលេខ : 092719106 / 012437676

 

ឯកឧត្តមទេសរដ្ឋមន្រ្តី បានបន្តថា​ ៖ ការសម្ពោធដាក់ឱ្យដំណើរការជាផ្លូវការមជ្ឈមណ្ឌលបណ្តុះបណ្តាល បើកបរយានយន្តធុនធ្ងន់ថ្មីនេះ គឺជាសមិទ្ធផលថ្មីមួយទៀតដែលអាចផ្ដល់សេវាសាធារណៈដល់បងប្អូនប្រជាពលរដ្ឋយើងបានលឿន មានប្រសិទ្ធភាព និងតម្លាភាពតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

 

ជាមួយគ្នានោះផងដែរ ឯកឧត្តមទេសរដ្ឋមន្ត្រី បានណែនាំឲ្យមន្ត្រីជំនាញបច្ចេកទេសក្រោមឱវាទពិចារណា លើការដកអាជ្ញាបណ្ណបណ្តុះបណ្តាលបើកបរយានយន្ត ដែលបានចេញទៅឱ្យក្រុមហ៊ុនទាំងឡាយ​ ដែលមិនបានធ្វើប្រតិបត្តិការរបស់ខ្លួនអស់រយៈពេលជាច្រើនឆ្នាំកន្លងមក។

 

ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី បានអំពាវនាវដល់បងប្អូនប្រជាពលរដ្ឋគោរពច្បាប់ ចរាចរណ៍ទាំងអស់គ្នាដើម្បីចូលរួមកាត់បន្ថយការគ្រោះថ្នាក់ចរាចរណ៍ដែលធ្វើឲ្យបាត់បង់ទ្រព្យសម្បត្តិជាតិ ទ្រព្យសម្បត្តិឯកជន ដែលមានតម្លៃប៉ាន់ស្មានប្រមាណ​ ៣៥០លានដុល្លារ​ ក្នុងមួយឆ្នាំ និងបានវាយតម្លៃខ្ពស់​ ចំពោះការចូលរួមពីសំណាក់បងប្អូនប្រជាពលរដ្ឋជាមួយរដ្ឋាភិបាល ដើម្បីទប់ស្កាត់គ្រោះថ្នាក់ចរាចរណ៍។

 

ឯកឧត្តមទេសរដ្ឋមន្ត្រី បានសំណូមពរដល់ក្រុមហ៊ុនដឹកជញ្ជូនកុំកែច្នៃយានយន្តខុសលក្ខណៈបច្ចេកទេស នាំឲ្យគ្រោះថ្នាក់ចរាចរណ៍ និងសូមកុំដឹកទំនិញលើសទម្ងន់កម្រិតកំណត់ដោយច្បាប់ធ្វើឱ្យផ្លូវឆាប់ខូច ដោយបានលើកឡើងនូវរូបមន្តដូចតទៅនេះ​ ៖ ឧទាហរណ៍ច្បាប់អនុញ្ញាតឲ្យដឹក​ ៣០តោន ប៉ុន្តែយើងដឹក ៤០តោន លើស ១០តោន នោះគេយក ១០ គុណនិង ១០ ស្មើនិង ១០០ យក ១០០ គុណនិង ១០ ស្មើ ១.០០០ យក ១.០០០ គុណនិង ១០ ស្មិនឹង ១០.០០០ ដូច្នេះឡានមួយគ្រឿង​ ដែលដឹកទំនិញលើស ១០តោន ស្មើនិងឡាន ១០.០០០គ្រឿង​ ដឹកទំនិញលើផ្លូវយើង។

 

ជាងនេះទៅទៀត បើមានឡានដឹកលើសទម្ងន់ ៣០តោន គេយក ៣០ គុណនិង ៣០ ស្មើនិង​ ៩០០ យក ៩០០ គុណនិង ៣០ ស្មើនិង ២៧.០០០ យក ២៧.០០០ គុណនិង ៣០ ស្មើនិង ៨១០.០០០ ដូច្នេះឡានមួយគ្រឿង​ ដឹកទំនិញលើស ៣០តោន វាស្មើនឹងឡាន ៨១០.០០០០គ្រឿង បើកលើផ្លូវយើង។

 

ឯកឧត្តមទេសរដ្ឋមន្ត្រី បានថ្លែងនូវការកោតសរសើរយ៉ាងជ្រាលជ្រៅ​ ចំពោះលោកឧកញ៉ា ប៉ាង ណាំ ដែលបានសហការយ៉ាងល្អជាមួយក្រសួងសាធារណការ និងដឹកជញ្ជូន ជាពិសេស ជាមួយអគ្គនាយកដ្ឋានដឹកជញ្ជូនផ្លូវគោក ក្នុងការរៀបចំឱ្យមានមជ្ឈមណ្ឌលពន្យារ និងប្ដូរបណ្ណបើកបរ នៅផ្សារទំនើបអ៊ីអន១ និងអ៊ីអន២ ការរៀបចំធ្វើបណ្ណបើកបរថ្មីមាន QR Code និងផ្លាកលេខឡានមាន QR Code ជាដើម​ ៕