បញ្ជូនជនសង្ស័យចំនួន ០៧នាក់ ទៅតុលាការ ពាក់ព័ន្ធករណីរក្សាទុក ឬជួញដូរដោយខុសច្បាប់នូវសារធាតុញៀន នៅក្រុងបាវិត ស្វាយរៀង ៖ នៅថ្ងៃទី១៧ ខែមេសា ឆ្នាំ២០២៤ សមត្ថកិច្ចជំនាញនៃការិយាល័យប្រឆាំងគ្រឿងញៀនកងរាជអាវុធហត្ថខេត្តស្វាយរៀង បានបញ្ជូនជនសង្ស័យប្រុសស្រីចំនួន ០៧នាក់ ទៅតុលាការ ដើម្បីផ្ដន្ទាទោសតាមច្បាប់ពាក់ព័ន្ធករណីរក្សាទុក ឬជួញដូរដោយខុសច្បាប់នូវសារធាតុញៀន។ សូមបញ្ជាក់ថា កាលពីវេលាម៉ោង ១៣:៣០នាទី ថ្ងៃទី១៤ ខែមេសា ឆ្នាំ២០២៤ ដោយមានការចង្អុលបង្ហាញពីលោក ឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង កម្លាំងមន្ទីរស្រាវជ្រាវ និងបង្ក្រាបបទល្មើស សហការជាមួយកម្លាំងមូលដ្ឋានកងរាអាវុធហត្ថក្រុងបាវិត ដឹកនាំដោយលោក វរសេនីយ៍ឯក ស្រី វុត្ថា មេបញ្ជាការរង កងរាជអាវុធហត្ថខេត្ត និងដោយមានការដឹកនាំសម្របសម្រួលពីលោក ដូរ៉ា អង្គប្រទាន ព្រះរាជអាជ្ញារងនៃអយ្យការអមសាលាដំបូងខេត្តស្វាយរៀង ចុះបង្ក្រាបករណី រក្សាទុក ឬជួញដូរ និងប្រើប្រាស់ដោយខុសច្បាប់នូវសារធាតុញៀន ចំណុចទីតាំងផ្ទះល្វែង ស្ថិតនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង ដោយឃាត់ខ្លួនជនសង្ស័យចំនួន ០៧នាក់ ៖

១. ឈ្មោះ ឡេ អាញ់ធឿន ភេទប្រុស អាយុ៣៤ឆ្នាំជនជាតិវៀតណាម មុខរបរមិនពិតប្រាកដ មានទីលំនៅបច្ចុប្បន្នស្នាក់នៅបណ្តោះអាសន្ន ស្ថិតនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង។

២. ឈ្មោះ ចាន់ វ៉ាន់ទៀង ភេទប្រុស អាយុ៣២ឆ្នាំ ជនជាតិវៀតណាម មុខរបរបុគ្គលិកអនឡាញ មានទីលំនៅបច្ចុប្បន្នស្នាក់នៅបណ្តោះអាសន្នក្នុងកាស៊ីណូបាវិតម៉ុកបាយ ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។

៣. ឈ្មោះ ចូវ ធីគីមវ៉ូយ ភេទស្រី អាយុ២៨ឆ្នាំ ជនជាតិវៀតណាម មុខរបរមិនពិតប្រាកដ មានទីលំនៅបច្ចុប្បន្នស្នាក់នៅបណ្តោះអាសន្នផ្ទះជួល ស្ថិតនៅភូមិបាវិតលើ  សង្កាត់បាវិត ក្រុងបាវិត ខេត្តស្វាយរៀង។

៤. ឈ្មោះ ហា ធីប៊ិតង៉ុក ភេទស្រី អាយុ២៦ឆ្នាំ ជនជាតិវៀតណាម មុខរបរមិនពិតប្រាកដ មានទីលំនៅបច្ចុប្បន្នស្នាក់នៅបណ្តោះអាសន្នស្ថិតនៅភូមិបាវិតលើ  សង្កាត់បាវិត ក្រុងបាវិត ខេត្តស្វាយរៀង។

៥. ឈ្មោះ ដន ធីង្វៀង ភេទស្រី អាយុ៣០ឆ្នាំ ជនជាតិវៀតណាម មុខរបរចុងភៅ មានទីលំនៅបច្ចុប្បន្នស្នាក់នៅបណ្តោះអាសន្នក្នុងកាស៊ីណូបាវិតម៉ុកបាយ ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។ 

៦. ឈ្មោះ ង្វៀង វាំងទឹង ភេទប្រុស អាយុ២៧ឆ្នាំ ជនជាតិវៀតណាម មុខរបរបុគ្គលិកអនឡាញ មានទីលំនៅបច្ចុប្បន្នស្នាក់នៅបណ្តោះអាសន្នបន្ទប់ជួល ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។ 

៧. ឈ្មោះ ឡី ឡី  ភេទប្រុស អាយុ៣៣ឆ្នាំ ជនជាតិចិន មុខរបរបុគ្គលិកអនឡាញ មានទីលំនៅបច្ចុប្បន្នស្នាក់នៅបណ្តោះអាសន្នសណ្ឋាគារបារីសបូព៌ា ស្ថិតនៅភូមិបាវិតកណ្តាល  សង្កាត់បាវិត ក្រុងបាវិត ខេត្តស្វាយរៀង។ 

     

ក្នុងប្រតិបត្តិការបង្ក្រាបនេះ សមត្ថកិច្ច បានដកហូតវត្ថុតាងរួមមាន ៖

-  ថ្នាំម្សៅម៉ត់កញ្ចប់ពណ៌ក្រហមសញ្ញារូបសេះ ចំនួន៦៤កញ្ចប់ ទម្ងន់ ៣៦១,៥០ ក្រាម ទាំងសំបកវិចខ្ចប់

-  ថ្នាំម្សៅម៉ត់ពណ៌ស ចំនួន ០៤កញ្ចប់ ទម្ងន់ ១៣៥,៦០ ក្រាម ទាំងសំបកវិចខ្ចប់

-  ថ្នាំកញ្ចប់ពណ៌លឿង ចំនួន ០៤កញ្ចប់ ទម្ងន់ ១០,០០ ក្រាម ទាំងសំបកវិចខ្ចប់

-  ថ្នាំគ្រាប់ពណ៌ក្រហម ចំនួន ០១កញ្ចប់ ស្មើ ៣២គ្រាប់ ទម្ងន់ ៤,៤០ ក្រាម ទាំងសំបកវិចខ្ចប់

-  ថ្នាំក្រាមពណ៌សថ្លា ចំនួន ០២កញ្ចប់ ទម្ងន់ ១០,៤០ ក្រាម ទាំងសំបកវិចខ្ចប់

-  កញ្ឆា ចំនួន ០៤កញ្ចប់ ទម្ងន់ ១៦,៣០ ក្រាម ទាំងសំបកវិចខ្ចប់

-  ថ្នាំម្សៅម៉ត់កញ្ចប់ពណ៌ក្រហមសញ្ញារូបផ្លែទំពាំងបាយជូ ចំនួន ១៧កញ្ចប់ ទម្ងន់ ១៧២,៥០ ក្រាម ទាំងសំបកវិចខ្ចប់

-  ថ្នាំម្សៅម៉ត់កញ្ចប់ពណ៌ស្វាយសញ្ញារូបផ្លែទំពាំងបាយជូ ចំនួន ១១កញ្ចប់ ទម្ងន់ ១២០,៥០ ក្រាម ទាំងសំបកវិចខ្ចប់

-  ថ្នាំម្សៅម៉ត់កញ្ចប់ពណ៌ស សញ្ញារូបផ្លែត្របែក ចំនួន ០៥កញ្ចប់ ទម្ងន់ ៥១,៨០ ក្រាម ទាំងសំបកវិចខ្ចប់

-  ថ្នាំម្សៅម៉ត់កញ្ចប់ពណ៌ខ្មៅរូបសត្វគោ ចំនួន ១២កញ្ចប់ ទម្ងន់ ៨៧,៧០ ក្រាម ទាំងសំបកវិចខ្ចប់

+ទម្ងន់ថ្នាំសរុប ៩៧០,៧០ក្រាម (ទាំងសំបកវិចខ្ចប់)។

-  លិខិតឆ្លងដែនចំនួន ០៣

-  ប័ណ្ណការងារបរទេសចំនួន ០១

-  សៀវភៅការងារបរទេសចំនួន ០១

-  អត្តសញ្ញាណប័ណ្ណវៀតណាមចំនួន ០១

-  ចានឈើសម្រាបប្រើប្រាស់គ្រឿងញៀនចំនួន ០១

-  ទូរស័ព្ទដៃចំនួន ១៦ គ្រឿង

-  រថយន្ត ចំនួន ០២ គ្រឿង

-  ជញ្ជីងសម្រាប់ថ្លឹងគ្រឿងញៀនចំនួន០១

-  ម៉ូតូចំនួន ០១គ្រឿង។

      

បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងជំនាញបញ្ជាការដ្ឋានកងរាជអាវុធហត្ថខេត្តស្វាយរៀង កសាងសំណុំរឿងបញ្ជូនទៅអយ្យការអមសាលាដំបូងខេត្តស្វាយរៀង ៕